Zodintluanga chuan, kum 2021-a Serchhip bye electionah khan tuna kan Chief Minister hian, kei hi pawisa engmah ka nei lo. Bye-election hi ka tan a huphurhawm lutuk, General Election-a ka leiba pawh ka la rul zo lo, tiin a sawi a. "Khatiang khawpa pawisa nei loa in sawi khan Chief Minister atana lakluh a nih hma hauhin a chenna tur Babel in sang sakna turin tlang a rawt nghal thei a ni", a ti.

ZPM party in Lalduhoma hi midangin an bei nasa niin an in ngai fo, Lalduhoma tluka midang bei nasa, mi zawng zawng beitu hi an awm lo. Zoramthanga phei chu Not Normal a ti duh a, Lal Thanhawla pawh Central Jail-ah chaw an chhum kep mek, ti duhtu a ni. Khatianga midang ti thintu khan amah mipuiin an vuak letna tuar thiam lovin a in hrosa mai mai.

Zodintluanga chuan, Lengpui ram hralh chungchangah file pangngaia a kal chuan MNF sorkar hotute kha manṭang eitu tur an ni. Chief Minister in, e khai, hei hi a ṭha hauh lo mai, tiin, 'kept in obeyance' tiin MNF sorkar laia file kal, manṭang eitute pawh an tih fel vek kha tihtawp a ni a. ZPM sorkar tharah inbiakna kalpui ṭhat leh niin an duh ang tawka an indawr hnuah, manṭang eitu thar list ti felin a chak thei ang berin file an kal tir leh tihna a ni, a ti bawk.